Zara Suniye

Mere har sawaal ka jawaab tum ho
Mere har gamh ka hisaab tum ho

Jiski hasti se ghoomti hai dharti
Meri hastii ka vo aaftaab tum ho

Kaali raat jise odhe roshni ke liye
Vo hasin chadar-e-mahtaab tum ho

Kaafir husn ki rooh mein bhare imaan
Rang-e-ishq ka pakeezah gulaab tum ho

Be-rabt panno se bikhre pade khayaal
Jis jild se bane muqammal kitaab tum ho

Thi ‘deep’ vo patthar jo tumne tarasha
Aaj bani heera to uski aab-o-taab tum ho